166
3.2.8.A. Incapacidade Permanente Parcial
¿Quen son os beneficiarios da prestación por incapacidade permanente parcial?
Aquelas persoas incluídas no réxime xeral que reúnan os seguintes requisitos:
– Ter menos de 65 anos na data do feito causante ou non reunir os requisitos esixidos para acceder á pensión de xubilación contributiva do sistema, se a incapacidade deriva de enfermidade común ou accidente non laboral.
– Estar afiliadas e en alta ou en situación asimilada á alta. Cando a incapacidade derive dun accidente de traballo ou enfermidade profesional, os traballadores consideraranse afiliados e en alta aínda que o empresario incumprira coas súas obrigas.
– Ter cuberto un período previo de cotización, se a incapacidade deriva de enfermidade común:
- De 1.800 días de cotización nos dez anos inmediatamente anteriores á data de extinción da incapacidade temporal da que deriva a incapacidade permanente.
- Para quen fose menor de 21 anos na data da baixa por enfermidade, o período de cotización esixido obtense da suma de dúas cantidades: a metade dos días transcorridos entre os 16 anos de idade do traballador e a iniciación do proceso de incapacidade temporal, máis todo o período, esgotado ou non, da incapacidade temporal (18 meses).
– No caso dos traballadores con contratos a tempo parcial, de relevo e fixosdescontinuos, para acreditar os períodos de cotización compútanse só as cotizacións efectuadas en función das horas traballadas, calculando as súas equivalencias en días teóricos de cotización:
- O número de horas efectivamente traballadas divídese por cinco, equivalente diario do computo de 1.826 horas anuais.
- O período de dez anos, dentro do cal teñen que estar comprendidos os 1.800 días ou os que correspondan segundo o caso, increméntanse na mesma proporción en que se reduza a xornada efectivamente realizada respecto á xornada habitual na actividade correspondente.
- A fracción de día asimílase a un día completo.
– Se a incapacidade deriva de accidente, sexa ou non laboral, ou de enfermidade profesional, non se esixe período previo de cotización.