101
3.2.1. Incapacidade Temporal
¿Quen son os beneficiarios dunha prestación por incapacidade temporal?
As persoas integradas no réxime xeral que reúnan os seguintes requisitos:
– Estar afiliadas e en alta ou en situación asimilada á alta na data do feito causante, mentres reciban asistencia sanitaria da Seguridade Social e están impedidas para o traballo. Se a incapacidade deriva dun accidente de traballo ou enfermidade profesional, considérase que están de pleno dereito afiliadas e en alta, aínda que o empresario incumprira as súas obrigas.
– Ter cuberto un período de cotización de:
a) Cento oitenta días dentro dos cinco anos inmediatamente anteriores ó feito causante no caso de enfermidade común.
b) No caso de persoas contratadas a tempo parcial, compútanse exclusivamente as cotizacións efectuadas en función das horas traballadas, tanto ordinarias como complementarias, calculando a súa equivalencia en días teóricos de cotización: o número de horas efectivamente traballadas divídese por 5 (equivalente diario do computo de 1.826 horas anuais), o período de 5 anos –dentro do cal teñen que estar comprendidos os 180 días–, increméntase na mesma proporción en que se reduza a xornada efectivamente realizada respecto á xornada habitual na actividade correspondente, e a fracción de día, asimílase a día completo.
c) En caso de accidente, sexa ou non de traballo ou de enfermidade profesional, non se esixe período previo de cotización.